Kærkomin sigur og heimvendur leikari

28. juli 2020

EB/Streymur vann mánakvøldið ein sera týdningarmiklan 3-1 sigur á Skála í Betri deildini hjá monnum. Lagt var upp til ein spenandi dyst millum nr. 10 og nr. 7 – ein klassiskur 6-stigs dystur í kappingini um at sleppa undan niðurflyting. Vann Skála dystin, so hevði støðan blivið sera jøvn millum tey fýra niðastu liðini, meðan EB/Streymur við einum sigri kundi leggja sjógv ímillum seg og liðini niðanfyri.

Tað gjørdist eisini ein javnur dystur, serliga í fyrra hálvleiki, sum endaði við javnleiki 1-1. Skála leikararnir tóktust ofta meira grammir, men blivu sjáldan heilt vandamiklir. EB/Streymur kom betur við í seinna hálvleiki, og hevði fleiri málmøguleikar.

Arnbjørn Hansen legði EB/Streym á odda heilt tíðliga í dystinum, og eftir at Skála hevði javnað í fyrra hálvleiki, so legði Gutti Dahl-Olsen EB/Streym framum aftur tíðliga í seinna hálvleiki. Tá Skála móti endanum fekk hornaspark, og sendi alt fólkið fram fyri at fáa útjavnandi málið, endaði tað við einum EB/Streyma-mótálopi, har Gutti, Ragnar og Tóki gjørdust einsamallir móti einum Skála-verjuleikara og málmanninum. Endin var, at Tóki hegnisliga sendi bóltin upp um Skála-málverjan og í mál til endaliga úrslitið; 3-1 til EB/Streym.

Nakað sermerkt, sum hendi í dystinum var, at EB/Streymur tá góður tími var farin setti nr. 17 á vøllin. Tey sum fylgja væl við vita, at nr. 17 hjá EB/Streymi er Petur Zachariasen. Petur hevur seinastu tíðina drigist við ein skaða, og hann var tí ikki við í hópinum í dag. Í staðin hevði ‘nýggi’ EB/Streymarin Bárður Olsen fingið blusu nr. 17 til láns. Bárður gjørdi sostatt comeback í EB/Streymi, júst 9 ár eftir sín seinasta dyst í blá-svørtum. Hesi árini hevur hann spælt við AB, B36 og HB. Higartil í ár hevur Bárður spælt við næstbesta liðnum hjá B36, men hevur nú altso gjørt sáttmála við EB/Streym, soleiðis at hann verður partur av Betriliðs-hópinum tað sum eftir er av hesum kappingarárinum.

Bárður er sum sagt ein gamal kenningur í EB/Streymi. Hetta var dystur hansara nr. 185 fyri EB/Streym í bestu deildini og dystur nr. 362 tilsamans í bestu deildini. Bárður var millum annað við til at vinna greipuna fyri EB/Streym í 2008. Umframt at vera ein sera góður leikari, so hevur 34 ára gamli víkamaðurin eisini ta neyðugu rutinuna, sum onkuntíð kann mangla á einum ungum liði – sum okkara er í ár. Hetta sóu vit longu tekin um á Skála mánakvøldið, tá stríðast skuldi fyri teimum trimum stigunum móti endanum.

Vit ynskja okkara monnum tillukku við sigrinum, og Bárði Olsen tillukku við sáttmálanum og vælkomnan heim.


Seinastu tíðindi

Fótbólturin byrjar spakuliga aftur
14.08.2020
Vinnararnir av lutaseðlunum
10.08.2020
Fannhard gevst í EB/Streymi
09.08.2020
Eingir áskoðarar komandi umførini
05.08.2020
Tillukku við degnum, Sverri
02.08.2020