EB/Streymur - HB 0-3
Sunnudagin leiktu EB/Streymur og HB í Betri deildini, og eftir stendur, at HB vann ruddiliga; 3-0. Havnarmenninir løgdu seg á odda í 2. minutti, tá Dan í Soylu stútaði bóltin í netið, eftir at bólturin kom innfyri úr høgru. Tá mundu EB/Streyma-viðhaldsfólk sanna, at mótbrekkan fór at verða tung at ganga.
HB var greitt omaná í spæli, og okkara leikarar stóðu í verjuformatión tíðum. Annað málið hjá HB kom stutt fyri steðgin. EB/Streymur hevði júst havt eina vandamikla støðu, har vit mundu skorað, men HB fór í kontraálop, fekk brotsspark, og hetta setti Stefan Radosavljevic trygt í netið.
Í hálvleikinum skiftu bæði liðini út í verjupartinum; Mikkjal Hellisá kom á vøllin fyri Árna Grunnveit Olsen og Daniel Johansen, sum hevur røtur í Sundalagnum, kom inn á vinstra bakk fyri Hera Mohr. Hjá EB/Streymi komu Arnar Dam og Rói H. Olsen á vøllin. Hóast EB/Streymur royndi eftir førimuni at fara í álop, so tóktist tað sum HB pressið ofta gav úrslit fyri teir reyðu og svørtu.
3-0 málið hjá HB kom eftir gott spæl høgru síðu, og innskifti Áki Samuelsen sendi bóltin upp í málhornið. Málverjin hevði ikki stórvegis møguleika at bjarga. Nú er at rista tapið av sær og líta fram til næsta dyst, sum verður ímóti TB við Stórá í Trongisvági 9. mai. Vit liggja á sætta plássi eitt vet betri enn ÍF. Stutt er millum sætta pláss og níggjunda, so gott hevði verið at fingið góða úrtøku úr nøkrum av komandi dystum. Drívið á!