07 Vestur og EB/Streymur spældu í kvøld á Dungasandi í Sørvági. EB/Streymur fekk einasta málið í dystinum í yvirtíðini, sum dómarin legði afturat. Tóki Johannesen stýrdi bóltin í netið eftir innlegg frá Ronni Møller-Iversen til stóra frøi fyri viðhaldsfólkini hjá EB/Streymi, sum høvdu leitað sær vestur.

Dysturin var javnur, og liðini høvdu hvør sínar góðu løtur. Tað var ikki sørt av spenningi, tí dysturin kundi verið koppaður báðar vegir. Tíðliga í dystinum tóktist EB/Streymur at vera meiri á bóltinum enn 07 Vestur. Tó varð bólturin ofta spældur runt aftarlaga á vøllinum. Onkrar støður og royndir vóru báðar vegir. Seinni í dystinum var spælið meira direkta, og ofta var trýst lagt á EB/Streym. 07 Vestur hevði onkra naska roynd á stongina, men lukkutíð fór bólturin ikki inn í málið. Innskifti Tóki Johannesen fekk ein bólt inn um verjuna tá umleið 80 minuttir vóru leiktir, men lobbið upp um málverjan var ov høgt og fór uppum málið.

EB/Streymur stillaði upp við fleiri veteranum frá byrjan. Hans Pauli Samuelsen var á vonginum, Bárður Olsen á miðjuni og Arnbjørn Hansen frammi. Hinir sum byrjaðu vóru Rói Zachariasen, Heðin Klakstein, Rói Olsen, Andras Olsen, Ári Arge, Hjalti Djurhuus, Símun Sólheim og Ronni Møller-Iversen. Inn komu Tóki Johannesen, Ragnar Danielsen og Elias Moustage.

Sigurin í dag var kærkomin og gott er at hála ein slíkan sigur í hús, tá ið á stendur. Leikararnir vóru raskir og avvístu vandamiklar bóltar, tá teir skuldu. Við sigrinum hava vit 15 stig á sætta plássi. Næsti dystur er móti KÍ 2. august, drívið á!